- Os equipos M10 e M12 medíronse a diversas escolas portuguesas nunha fin de semana histórica para o club.
- A escola pechará a tempada esta próxima fin de semana coa derradeira concentración galega en Vigo.
A escola do CD Zalaeta Rugby Arteixo vén de marcar un fito na súa traxectoria formativa. Esta pasada fin de semana, as categorías inferiores do club cruzaron a fronteira para participar no XIII Braga Youth Rugby Cup, asinando así a primeira experiencia internacional da entidade fóra do circuíto autonómico.
A rapazada de categoría M10 e M12 (Sub-10 e Sub-12) competiron durante a xornada do sábado e do domingo nun torneo organizado polo Braga Rugby. Os xogadores arteixáns tiveron a oportunidade de medirse sobre o terreo de xogo a escolas lusas de gran tradición como as de Trofa, Arcos de Valdevez e o propio club anfitrión de Braga, entre outros conxuntos portugueses.
Máis aló do plano puramente deportivo, a viaxe supuxo unha experiencia vital e deportiva inesquecible tanto para os mozos xogadores como para o club e as familias desprazadas.
Desde a directiva do CD Zalaeta Rugby Arteixo sinalan que esta iniciativa —a primeira competición da escola fóra das concentracións oficiais galegas— supuxo un importante desafío económico e loxístico para a xestión da entidade. Non obstante, o balance é inmensamente positivo, xa que o esforzo compensou con creces polo crecemento humano e deportivo vivido pola canteira nestes dous días de convivencia.
Broche final á tempada en Vigo Tras o éxito en terras portuguesas, a escola xa prepara as maletas para a súa próxima e última parada do curso. Esta próxima fin de semana, os xogadores desprazaranse a Vigo para disputar a derradeira concentración de escolas de rugby galegas.
Este evento porá o punto e final á tempada de competicións, pechando un círculo que comezou precisamente nos campos de Ponte dos Brozos no mes de outubro, onde o club abriu o calendario autonómico logrando un gran éxito tanto de organización como de afluencia de visitantes.